Le fragne ét sen doute l’abre le pu coumùn de noutre cuntràie. Le pousse prtout : den lés fouràets, lés palisses, au bord de l’aeve, den lés parcs… Un le requeneùt de lén a sun feùllajhe léjhàe é sa hàutour. Au bord daus rivéres queme le pousse vite é qu’ol ét in bun boes de chaufajhe, l’étét ébranchai en hàut dau pilét touts lés neùv ans pr le feù. Le fragne repoussét en laechant den l’ivér paraetre çhés piléts tout caléts queme daus bounoumes çhi aviant l’aer d’étre lés gardiéns dau péyis. Avéc sés feùlles sechàies, ol étét fét ine décocciun « la fragnéte » çhi soegnét tout pisqu’ol étét dit qu’o fasét daus centenaeres. Sa pea s’écale bén pr faere daus sublléts ou daus grandes trunpes. En pocant avéc le manche de sun coutea su ine tijhe de l’annàie, le boes se sort de sa pea. O se fesét de maeme in subllét, ou ine touroute en enrolant ine grande pea en luma.
Le nom des arbres en parlanjhe. Catalogue réalisé à l’occasion des journées Vivre et faire vivre la langue régionale les 5-6 octobre 2013 à Melle.