Tranlaciun en parlanjhe dau tésce de Moustapha Dahleb, grafegnour tchadién, L’humanité ébranlée et la société effondrée par un petit machin.
L’ouménetai sicotàie é la souciétai éfaujhàie pr in petit machin
In petit machin microscoupique noumai coronavirus détrvire la pllanéte. De quàe d’invesiblle vénghit pr faere sa loe. Le remét tot en quésciun é trvire l’ordre assoutrai. Tot se remét en pllace, autrment, diférament.
Ce que lés grandes pissences occidentales avant pa poghu avoer en Syrie, en Lybie, au Yémen… çhau petit machin o z-at oghu (césséz-le-feù, tréve…).
Ce que l’armàie arjhériéne at pa poghu avoer, çhau petit machin o z-at oghu (le Hirak s’at cllacai).
Ce que lés opousants poulitiques avant pa poghu avoer, çhau petit machin o z-at oghu (virement daus votaciuns…).
Ce que lés entrprises avant pa poghu avoer, çhau petit machin o z-at oghu (mendrement d’énpous, éxounéraciuns, grédit pr rén, funs d’énvéstissement, baesse daus coutements daus matéres prméres stratéjhiques…).
Ce que lés jhiléts jhaùnes pi lés séndicats avant pa poghu avoer, çhau petit machin o z-at oghu (baesse dau coutement de l’éssence, proutécciun souciale assolidesie…).
D’in cop, den le munde occidentàu, l’éssence a baessai, la poluciun a baessai, lés mundes avant quemençai a avoer dau tenp, si tant de tenp que le savant pa quàe en faere. Lés parents aprnant a queneùtre leùs draules, lés draules aprnant a rechtàe en famelle, le travall ét pu ine primautai, lés véyajhes pi lés lésis sant pu la norme d’ine vie abenàie.
D’in cop, sen rén dire, i nous dévirun en nous-maemes é cunprnun la valour daus mots solidaeretai é vulnérabiletai.
D’in cop, i prnun cunsience qu’i sun trtouts su le maeme batea, riches é pa riches. I prnun cunsience qu’i aviun vidai ensenblle lés échalétes daus magasins é veyun ensenblle que lés oupitàus sant plléns-foussis pi que l’arjhent at pu ghére d’énpourtance . Qu’i avun trtouts la maeme identetai ouméne face au coronavirus.
I prnun cunsience que den lés garajhes lés béles voetures sant cotàies rén qu’a cause qu’ol ét défendu de sortir.
Ol at falu sement çheùques jhours a l’univérs pr assoutràe l’égaletai souciale çhi étét pa poussiblle a émajhinàe.
La pour at envasi tot le munde. Al at chanjhai de canp. Al at çhitai lés pauvrious pr allàe ché lés riches pi lés pissents. A leù z-at rapelai leù z-ouménetai é leù z-at décachai leù z-ouménime.
Qu’o pejhe sarvir a avoer aprcevence de la vulnérabiletai daus oumes çhi trchant a alàe demeùràe su mars é çhi se créyant forts pr cllonàe daus mundes pr éspéràe vivàe de manére étrnale.
Qu’o pejhe sarvir a avoer aprcevence de la devise de l’entendoere ouméne face a la force dau ciàu.
Ol at falu sement çheùques jhours pr que ce qui étét sur vénghisse avessi, que la force vénghisse feblléce, que le pevoer vénghisse solidaeretai é cunjharnance.
Ol at falu sement çheùques jhours pr que l’Afrique vénghisse in cuntinent sur. Que le sunjhe vénghisse mentrie.
Ol at falu sement çheùques jhours pr que l’ouménetai prenjhe cunsience qu’al ét que bufe é pouvre.
Çhi sun z-i ? Çhi qu’i valun ? Qu’ét o qu’i pevun face a çhau coronavirus ?
Rendun nous a l’évidence en éspérant la prouvidence.
Quésciounun netre « ouménetai » den çhéte « mundialetai » a l’éproue dau coronavirus.
Rechtun ché nousàutres é résuun su çhéle pandémie.
Aemun nous vivants !
Auréllén