Le parlanjhe étét a l’ounour a Thorigné lés 22 é 23 de fouvràe darnàes avéc Parlanjhes en fàete : ine seràie pi ine jhornàie sou le segne daus parlanjhes matrnàus/réjhiounàus çhi maelirant jhouries de prouféssiounàus (Francis Le barbier pi Patrice Massé en parlanjhe, Michèle Bouhet) pi d’amatours den le cadre de la 11aeme édiciun de la Journée internationale de la langue maternelle.
Core çhéte annàie pr la Jilm, daus disaenes de participants dau Poetou-Chérentes-Vendàie avant causai, cuntai, chantai, lisu, musicai… en parlanjhe poetevin-séntunjhaes é pi en oucitan. Ol avét bé dau munde pr lés écoutàe é lés vere pi causàe avec zeùs autour daus stands daus parçouneries-auteùrs-chantours-cuntours çhi présentiant roleas, CD ou bedun DVD.
Pr trminàe la jhornàie dau samedi, ol oghit daus projhécciuns de vidéo pr causàe de la passance dau parlanjhe den lés média, avéc noutament ine difusiun surprise d’ine émissiun Parlanjhe dau mitan daus annàies 80 su FR3 réjhiounàu. Ol étét çheùque chouse çhéte émissiun : ine demi-eùre tot en parlanjhe a la télé ! Aneùt, o fét luntenp qu’ol at pu rén en parlanjhe a la télévisiun… é vrae qu’ol at l’éntrnét avéc daus afaeres que lés mundes pevant métre pi lés émissiuns « Kétokolé » de Yannick Jaulin voure le doune daus ésplliques su n-in mot de poetevin-séntunjhaes. Pi, bé sur, lés émissiuns en parlanjhe a la radio (RCF Poitou, RCF Vendée, D4B).
Marci a tots çhés de Parlanjhe vivant, de l’UPCP-Métive, a trtouts qui vénghirant causàe leù parlanjhe obe présentàe daus roleas é pi au publlic !
Retrovéz lés tésces de la 11e Jhornàie éntrnaciounale dau parlanjhe matrnàus é i ve disun a l’annàie prchéne pr la 12aeme édiciun !
