Décenbre. Al étiant deùs.
Deùs feùlles den le ceraesàe dépllumai,
Deùs feùlles en révolte
Çhi se balanciant den le vent fréd dau matin.
A se narguiant pr vere çhéle çhi cheùrét la prmére
Çhéle çhi téndrét bun le pu luntenp.
Çhéle dau coutai dau souléll
Fasét sen césse vere sa béle face doràie
É dancét queme in parpallun
Ou bé queme in osea.
L’àutre dau coutai de l’unbre
Sautét queme in boessàe de puce den ine grnote.
A saviant ce qui lou z-ariverét ;
Qu’ét o qu’ol ét, deùs feùlles den in ceraesàe
A l’aprche de l’ivér ?
Rén.
Faut bé étre déseùvrai ou avàe dau tenp
Pendant le cunfinement pr arellàe
Lés feùlles dau ceraesàe.
Prtant o se veyét qu’a veliant prfitàe de la vie
Dau mae qu’a peviant…
Queùs segnes pr lés ouméns !
A Nàu pu rén.
Lés deùs béles avant seghu le vent
Çhi lés at évolajhàe vér la rivére
Çhi lés roule jhusqu’a la mér
Ou bé lés laesse su ine terére
Voure a ferant fleùri la fevràie
La primevére ou le coucou.
Queù béle vie !
La vie çhi redoune la vie !
Maryvonne