Bunjhour lés mundes.
Sunjhéz-dun, o y at environ 250 annàies, in brave oume prpousét de chanjhàe le num daus rues de Poetàe coume ol avét étai fét çheùques annàies avant den la capitale françaese.
O se paraetrét que daus rues avant daus nums bijhars, çheùques foes désavenents, é pr l’ounour de la naciun é faere décessàe lés ricoenes daus étranjhàes escandalisais, o faudrét chanjhàe çheùques noms…
A periant demési portàe daus nums de rivéres, de prouvinces, oubé de viles remarquablles.
Pr éxenplle, o serét bun de chanjhàe daus nums coume la rue de la Corne de Bouc, rue de la Queue de Vache, rue de la Truie qui File, de la rue de Pousse Penille, rue de la Poire Cuite, oubé de la rue de Pisse-Près…. Çhi sant daus noms riablles d’apràe li…
D’après çhél oume daus nums coume rue du Clain, de la Vienne, de la Boutonne, oubé de Saint-Maixent iriant bé meù é seriant bé pu agralants a dire… O parét d’apràe li que çhés mouts bas fesant naetre daus mouvaeses idàies é avilant noutre parlanjhe.
Bé sur, o ferét enbroulle é o se perdrét daus féts istoriques é locàus, é bé daus yins sécarteriant den Poetàe…
Aneùt, i queneù pa de rue avec daus nums çhi avant ce charme de l’istoere.
I ae trové çhéle afaere den in jhounàu dau péyis, les Affiches du Poitou dau prmàe de Jhanvràe de 1774.
Si i métiun çheùques nums de nous rues en parlanjhe, o serét o pa pu bea ?
A béntout…
JS, sébtenbre 2015
La Minute parlanjhe : dau léndi au vendrdi su RCF-Poitou a 11 eùres 30