Bunjhour lés mundes.
L’àutre semadi qu’ét pa vieù, i me sé nalai au grand Bal Poetevin ché nous amis vendéyéns dau Bas Poetou a La Roche Su Yun. Durant six eùres, i ae étai nijhai den la çhulture Poetevine, ol at étai ine nijhade (ine imérçiun) coume le disant aneùt, coume i aemerae ou z-entendre é z-ou dançàe pu souvent.
Qu’ol at étai bén d’entendre çhés deùs orçhéstres, yin dau péyis de Vendàie (Écllerzie) é l’àutre de Chérente. Chaquin lleù tour, le se répouniant a cot de chançuns en parlanjhe oubé en dances dau Poétou, é de Chérente bé su. Etou, ol at fét dau bén d’entendre causàe le munde, é de voer tot pllén de mundes dançàe.
Pr in petit moument, i ae çhitai le munde normalisai, formatai voure i sun trtouts tout le tenp.
Ol ét bé doumajhe de demeùràe au mitan dau Poetou, dau Haut Poetou, é qu’o fàut faere tot pllén de çhilométres pr entendre chantàe é dançàe poetevin que, baecop avant oublliàe que le sant poetevin é que le demeùrant den le Poetou.
Éreùsement, éreùsement bé su, qu’o y en at çhi sunjhant, coume nous àutres, que le Poetou é sun parlanjhe sant trjhou in petit vivants… É ol ét pa fini….
A béntout.
Jacques, mar 2015.
La Minute parlanjhe : dau léndi au vendrdi su RCF-Poitou a 11 eùres 30